KATAHIMIKAN AY BASAGIN, CHILD ABUSE AY LIPULIN

CHILD ABUSE: Epekto nito at Bakit Dapat Itong Puksain.

     Marami sa atin ang nakakakita araw-araw ng mga batang pagala-gala sa kalsada o hindi kaya ay sa bangketa. Karaniwan ang iba ay nanghihingi ng limos ngunit ang iilan ay gumagawa ng krimen na hindi mo aasahan na kayang gawin ng isang musmos na gaya nila.

     Sa gayong paraan pa lamang ay makikita na kung gaano sila napababayaan ng kanilang magulang at mas nakatatanda sa kanila; nakikita na rin dito ang pang-aabuso na marahil ang pinag-uugatan ng kanilang pagiging isang mapusok na bata.

     Nagsimula rin tayo sa pagiging isang munting musmos, karamihan sa atin ay nakaranas ng isang maginhawa at mapayapang buhay. Pasukin naman natin ngayon ang mundo ng mga batang nasa panig ng api.

ANO NGA BA ANG CHILD ABUSE?

     Ito ay ang pagtrato sa mga bata at kabataan sa maling paraan ng kanilang mga magulang, tagapag-alaga, o kakilala na nagiging dahilan ng paghina ng kanilang pang-pisikal, pang-sikolohikal, at pang-kaisipan na kalusugan. 

     Ang pananakit ay kadalasang pisikal; pananakit, pagsusunog, at pagkagat. Bagamat ang pamamalo ay isa nang normal na paraan upang madisiplina ang isang bata, lumalabas pa rin itong mali kung ito ay sumusobra na. Ang ilan pang halimbawa ay sa sikolohikal at pangkaisipan ay ang paninigaw, pagmumura, pangmamaliit sa kanila at pagsabi ng masakit na mga salita. 

     Mayroon din tayong tinatawag na sekswal na pang-aabuso na mas sensitibo kaysa sa iba. Ito ay ang pagsangkot ng mga bata sa sekswal na aktibidad tulad ng child pornography at panggagahasa.

     Panghuli ay ang pagpapabaya na siyang paulit-ulit na nangyayari. Ito ay ang hindi pagbibigay ng sapat na atensyon na kinakailangan ng isang bata, at kadalasan na may nakaambang na malaking panganib kung ipapapagpatuloy ng isang nakatatanda o isang tao ang ganitong pakikitungo sa isang munting musmos. 

PAANO ITO NAKAKAAPEKTO SA ISANG BATA?

     Marami itong nahahadlangang aspeto ng buhay ng isang bata, isa na rito ay pagkakaroon ng takot na kadalasang nagdudulot sa kanila ng trauma na sumisira sa angkop na paraan ng kanilang pag-iisip at pagkokontrol ng damdamin. Nawawalan din sila ng tiwala sa kanilang sarili, sa kapwa, at sa mga taong nakapaligid sa kanila. Hinahadlangan din nito ang pagpapakabuti ng isang bata at maaari nitong maapektuhan ang kanyang kakayahan upang makatulong sa lipunan. Higit sa lahat ay napipigilan din ang paglaki niya ng normal dahil natatanggalan siya ng mga karapatan na nararapat matamasa ng isang bata na kagaya niya. Dapat din ay pantay-pantay ang pagtrato natin sa bawat bata anupaman ang kanilang itsura, edad, o katayuan sa buhay.

PAANO SILA MATUTULUNGAN?

     Upang mabigyan ng proteksiyon ang mga inosenteng musmos na nagiging biktima ng karahasan, ginawang batas ng gobyerno ang RA 7610 o “Protection against child abuse, exploitation, and discrimination” at RA 9262 o “Anti-violence against Women and their children Act of 2004” na mayroong karampatang parusa sa kung sino man ang mahuling lumalabag dito.

Ngunit masasabi ko na dapat simulan muna ito sa mga magulang at sa mga nakakatanda na nag-aalaga na siyang dapat unang humuhubog at unang guro ng isang bata upang masimulan niya ang pagtahak sa landas ng katagumpayan na maayos at buo ang loob.

Ang mga bata ay hindi dapat sinasaktan dahil sila ang ating kinabukasan at pag-asa sa hinaharap. Nararapat natin silang gabayan nang sa gayon ay magkaroon sila ng magandang buhay at nang tayo rin ay kanilang alagaan. Dapat ay ipinapakita at ipinaparamdam sa kanila ang pagmamahal na kailangan nila at maging mabuti rin tayong ehemplo sa kanila para maging mabuti silang tao at hindi piliin ang alam nilang mali sa batas moral at batas ng Diyos. 

     Nawa'y maging mulat ang bawat mamamayan ng bansa at ng buong mundo sa ganitong klase ng usapin, maging kaisa nawa sila upang tuluyang masugpo ang ganitong hindi makataong klase ng pang-aabuso sa bawat musmos na mayroong malaking pangarap na nais makamit sa kanilang buhay sa hinaharap.

"KABATAAN ANG PAG-ASA NG BAYAN." - Dr. Jose Rizal, Pambansang Bayani ng Pilipinas



KABATAAN, gumising ka!
Ikaw ang inaasahan nitong bansa.
Humayo ka at magpursigi
Nang makatulong sa mga naaapi.

Huwag mong itikom ang iyong bibig
Iparinig mo sa kanila ang iyong hibik
Huwag mong hayaan na gawin sayo ang hindi mo ibig
Isa kang Pilipino — may karapatan na tumayo at tumindig.

Nagpapaalala...
Pascual, Dela Paz, at Ogerio.